中美貿易戰再掀戰幔，簡單講呢兩日發展：美國星期六又挑起條筋，向中國總值500億美元進口商品收25%關稅，於是中國就緊係輸人唔輸陣，大喝一句，「你500億，我500億！」。不過，特朗普顯示一副「我耍你就得，你報復我就嬲！」嘅姿態，竟然晒你冷，「你報仇呀嘛？咁我諗吓罰多你2,500億商品啦啦啦！」今次呢場貿易博奕戰，中國形勢，暫時似乎處於下風。輸喺邊？就喺以下呢四點！

首先，就梗係豬隊友中興（763）！由一開初違反伊朗禁令，然後將自己犯罪紀錄白紙黑字寫低，再俾美國人贓並獲，就已經「豬出國際」。呢單連中國都兜唔到嘅豬事，令美國有一個大籌碼，大條道理撚化你！

6月頭中興同美國先簽原則性協議，取消針對中興嘅制裁；事隔半個月都冇，參議院唔通過，於是又要恢復制裁啦。特朗普大條道理同中國講，「唔係我唔幫你，我幫你幫到出晒面啦，出埋Twitter啦，但依家係參議院唔畀呀嘛。」話分兩頭，特朗普承諾救中興前，佢個女伊萬卡喺中國拎到7個商標。

其二，美朝峰會順利舉行，特朗普同金仔握晒手笑笑口。本來中國就係美朝中間人，亦因為咁，美國於峰會前，就突然收火，仲聲言放生中興（神又係佢鬼又係佢）。依家，美朝關係史無前例咁好，中國「中間人」角色力量已經無咁大，令中國籌碼又減一個，而特朗普本身冇咩形象可言，玩過橋抽板又如何？

你可能會話，北韓都可以反口呀！但你睇特朗普信心十足，就知佢真係傾掂數（不得不提，佢用iPad畀金仔睇條片，真係無得頂）；而金仔今次大玩微笑外交，好明顯佢真係想脫貧，如果唔係嘅，真係想問句「年輕人，山長水遠去新加坡，係愛定責任呀？」「係窮呀！」

其三，呢點總括而言，就真係「越強越見鬼」！美國進口中國多，達4300億美元；至於「世界工廠」中國，入口美國商品少，只有1,600億美元！對於美國來講，「車！我都唔係好多貨出口去你度，你咪加囉。」中國想增加美國商品關稅？最多咪加到1600億美元，之後根本就加無可加！所以單係商品關稅呢一戰，中國係輸咗。

第四，談判技巧上，一旦「You show me you care」就已經輸一半。當日特朗普一句放生中興，換來中國外交部一句「十分讚賞」。有人打你，然後佢突然唔打，你唔會無啦啦讚佢，「你個人真係好呀！」一向態度強硬嘅中國，今次突然展示自己大方嘅一面，多多少少顯示，佢有啲買特朗普怕。

不過，又唔好忘記，中國真係無咁易認輸，喺服務業方面，中國係逆差；與此同時，中國3萬幾億美元外匯儲備，當中有過萬億係美債。今次回應特朗普戰書，中方只用300字回應，更有山雨欲來之兆。

by千頌C@堆填區
http://fb.com/winbigwok