恒指連續兩日企穩25000樓上收市，霸氣十足，有趣嘅地方係，強勢股如地產股、友邦（1299）、港交所（388）開行turbo外，連公用股都按捺不住，兩電一煤齊創52周新高。睇真啲，中電（002）同電能（006）股息率分別有3.8及3.5厘，喺超低息環境下，其實吸引到暈，惹來資金掃貨變得理所當然。
早排提過永利地產（864）異常強勢，噚日終於發力，一升仲要係三成，破晒頂！爆升過後，最新市值依然得5億銀，加上PB未夠0.6倍，仲未到戲肉。CW Group（1322）再創新高，主要有兩個催化劑。一、鐵定下周五（29日）放榜，有炒業績憧憬；二、申銀首度推介，建議買入，目標價3.22元。正式進入冇蟹貨區，短線目標先睇3蚊，有貨嘅戰友繼續坐定定。