當年今日
關於我們

【隔空互寸】須藤凜凜花宣佈閃婚 大島優子粗口回敬

蘋果日報 2017/06/18 14:00

AKB48大島優子NMB48山本彩須藤凜凜花

【新增內容】噚晚舉行嘅「第9屆AKB人氣總選」由指原莉乃三度登上一姐寶座,而再做阿二嘅渡邊麻友就宣佈畢業,但兩位阿姐卻不及20歲嘅NMB48成員須藤凜凜花搶fo,佢於台上自爆結婚,令唔少傾家蕩產為佢投票嘅男fans大受打擊,好多粉絲就話感到被偶像出賣,仲有人誇張到話想自殺o添!
須藤凜凜花被雜誌《週刊文春》踢爆犯禁拍拖,佢原來暗交一名任職醫護人員嘅圈外男友,日前收工更到男友寓所過夜斷正。須藤凜凜花受到力捧,不過甫爆戀情即懶理粉絲感受玩閃婚,唔少AKB師姐都對佢決定感到無奈,尤其NMB隊長山本彩更於網上直播度大感不快,仲話:「講真?發生咩事?唔明呢個人諗緊乜。」明顯連山本彩都被蒙在鼓裡。曾登上一姐寶座嘅大島優子表現更激,佢於盛會後在車上透過Ig直播話:「發表結婚,究竟諗乜?我都好想結婚啊!」講到最尾,優子就話:「呢頂帽係我最想講嘅說話。」接住佢低頭展示白色帽上面嘅英文粗口「Fxxk」。網民指佢雖面掛笑容,但明顯係十分不滿,有網民仲形容:「女人真係好恐怖。」前總監督高橋南都不吐不快,自言優子頂帽已講出大家心聲。
其實須藤凜凜花出名亂噏嘢,佢曾於社交網自言仲係處女,又喺節目《AKBINGO!》上投訴事務所大細超,透露自己人工勁奀,每個月慳住過1萬日圓(約670港元)嘅貧苦生活。
今日,須藤凜凜花現身那覇機場離開沖繩,佢未有回應提問,指日後會詳細向大家交代,而佢身上穿着印有「DAMN」(該死)字句嘅T恤,傳媒就認為係用嚟回應優子。
empty
須藤凜凜花於「第9屆AKB人氣總選」台上宣佈閃婚。
empty
NMB隊長山本彩感到相當無奈。
empty
大島優子昨晚直播寸爆須藤凜凜花。
empty
大島優子更以粗口帽回敬。
empty
大島優子、小嶋陽菜同峯岸南賽後慶祝。
empty
須藤凜凜花離開沖繩,其身上嘅T恤被指係回應優子嘅爆粗。