有立法會「醬爆」之稱嘅工聯會議員陸頌雄，噚日喺立法會扑咪時嬲爆爆，到底俾邊個激親？佢話喎，前日約咗教育局副秘同相關總教育主任開會，希望佢哋聽吓十幾個非學位社工吐苦水，講講如何受到政府將喺新學年實施嘅「一校一社工」政策影響。點知一班社工前日準時下午5點半到立法會後，教育局官員一直冇影，呢位醬爆哥即時打畀教育局政治助理施俊輝投訴，竟獲告之政府搞錯咗會面時間，以為噚日先至見班社工喎！
陸頌雄噚日痛斥教育局竟然咁都甩轆，令到一班撲空嘅社工十分失望同憤怒，批評教育局一直冇正視呢班社工嘅處境，佢仲開出時限，要求教育局喺7日之內，並改由教育局局長楊潤雄親自盡快接見呢班被放飛機的社工喎。

教局︰日期從來沒變

到底真相係點？教育局搞咗一輪終於查清楚，揭發真正甩轆嘅原來並唔係教育局，而可能係醬爆本人。教育局傍晚出新聞稿澄清，話根據局方電郵紀錄，雙方擬訂嘅會面日期、時間「從來沒有改變」，就係噚日下晝5點半，而地點就係立法會其中一個會議室，強烈否認「局方甩轆」之說。發言人仲話樂意聆聽業界嘅不同意見，會再次安排會面喎。

李八方