開季急先鋒練馬師有唔少，徐雨石是其中之一，頭兩個賽日分別贏兩場及一場後，這天（10日）徐雨石於沙田第四場五班1400米以「電訊大炮」再下一城，連勝三次賽事未斷纜。五歲馬「電訊大炮」跑至第21戰，配田泰安服役首度取勝，單Win及組合獨贏A3分別派97及27.5元。

「電訊大炮」沿途在尾列，末段在田泰安胯下殺上有力，連追多駒突圍，贏1.25馬位。徐雨石開季未斷纜，暫有4Win繼續在練馬師榜帶頭，今場幫佢建功的年輕騎師田泰安，亦季內暫時日日有贏馬。

田泰安開鑼日（3日）起孖，剛周三（6日）晚亦有一捷兼勝出騎師王，今日則贏「電訊大炮」，表現同手風均持續向好。

徐雨石說：「『電訊大炮』跑1400好過1200米，騎師田泰安發揮得很好，及早移出外疊搵位。好在此駒上季尾最後一仗雖只跑第四，但評分卻因此加回到安全線，救馬成功，得以保留在今季仍可上陣，否則講乜都冇用，不會有今場勝仗出現。」

第四場二至四名分別為「知道勝」、「福之寶」及「永高」，四重彩派六萬一千幾。其中亞軍「知道勝」騎師莫雷拉出擊未竟全功，這天暫未能夠連中三元。