門外漢聽音樂 - 左丁山

蘋果日報 2020/10/26 07:13

王羽佳邵頌雄郎朗

左丁山對古典音樂,絕對係門外漢,當然與自小缺乏音樂教育有關。在小時上音樂堂,去到小六程度啫,嗰陣邊有錢去學樂器吖。到咗中三暑假,先父買咗一個原子粒收音機,高科技也,放暑假中午時份睡在冷巷碌架床,天氣悶熱,滿頭大汗之下,無意中聽到香港電台一個節目叫做「醉人的音樂」,主持人陳浩才,於是第一次接觸到古典音樂,聽聽吓,心靜自然涼,放完暑假返到學校,粗口都講少咗,古典音樂可以陶冶性情,係左丁山第一手經驗。
今年有咗C19疫情之後,在家時間多咗,出外應酬少咗,於是經常開着電腦聽香港電台第四台,有時聽聽吓就瞓着咗,十分舒服。親戚問:「你駛唔駛買部靚Hi-Fi嚟聽唱片呀?音色好過電腦好多噃!」唔駛咯,記得1987年股災前,左丁山還有錢搞住宅大裝修,用萬幾兩萬蚊買一套日本音響返屋企,請教已故老友吳仲賢,Hi-Fi達人也,問佢:「應該點樣擺放先至有最佳效果?」吳仲賢反問:「套音響買咗幾多錢?」答:「萬幾」,吳仲賢大笑:「咁有乜好問呀,亂擺都得啦!」從此左丁山不敢再買音響。近年認識著名經濟師梁兆基(Chris Leung,星展銀行),講起嚟,原來佢係音響高手中之高手,佢講音響配套,高深過分析經濟大勢,聽完更加唔敢買音響,只係用千零蚊買一個微型Bose擴音器,用藍牙接駁手機聽Radio 4,效果當然不入高人法眼,自己就已經夠晒。
古典音樂愈聽愈覺得不可思議,巴哈,布藍姆斯,貝多芬,莫扎特……等等,點可能用音樂符號創作咁複雜,前後呼應動聽悅耳,聽極不厭嘅作品㗎?我哋呢啲凡夫俗子,簡直無法想像呢類天才嘅腦袋係如何構造,能為各種不同樂器編製出統一互相和諧配合之樂音。前星期睇到蘋果邵頌雄痛批郎朗彈奏巴哈「哥德堡變奏曲」,方知天下之大,原來聽音樂有咁多深刻學問。呢日中午飯局碰到公子L,問佢郎朗如何?公子L曰:「梗係差啦,佢彈琴技術好高,但一彈哥德堡變奏曲就知佢文化修養唔夠!」喂,郎朗係中國鋼琴面孔噃,公子L話:「唔係噃,快啲上YouTube搵Yuja Wang,王羽佳,我認為佢先至係中國鋼琴面孔!」返到屋企,急急上YouTube欣賞吓,呢位穿着超短裙、六吋高跟鞋,露背低胸之33歲北京女郎(長居紐約)果真係世界級!