o依家網上嘅影響力愈來愈大，無論係媒體，娛樂圈，做咩行業都要搞好網上宣傳，以前概念係放上網俾人免費睇係蝕底，但o依家唔放上網，可能宣傳效力勁減就真。

其中一個指標當然影片網站龍頭大哥YouTube啦，佢哋今日就公佈香港十大熱門音樂影片，第一位諗都唔洗諗，係廸士尼動畫《冰雪奇緣》嘅主題曲《Letitgo》。第二位，就係周柏豪嘅《傳聞》，佢同師妹連詩雅嘅網上宣傳喺香港藝人中算做得唔錯。第三位，大家可能佔唔到，就係「MK-Pop元祖」組合「天堂鳥」嘅《登陸太陽》，回想起「天堂鳥」當初寂寂無聞，掟咗個MV上網都冇人理，到佢被高登仔發現放上高登恥笑舞步同化妝，o依家終於都「苦盡甘來」媳婦熬成婆，叫多人識咗，出活動嗌得出名!佢哋真係要多謝高登先呀!佢哋仲唔止一首歌上榜，另一首歌《Whatyouwant》都上到去第十位，真係好威水，証明「豁...豁出去」，真係有回報o架!

而頭10位得8首係本地音樂影片，除咗「天堂鳥」嗰兩首，受到「MK-Pop」熱潮影響而受人注意嘅另一隊MK-Pop組合「Faith」嘅kai歌《MAMAEasy》都入咗第8位，而樂隊DearJane嘅《一去不返》就係第6位，高登女神謝安琪嘅《雞蛋與羔羊》比想像中低，得第7位，之後第9位Kay都算有有四分之一功勞，就係佢有份演出張智霖嘅翻唱歌《你是如此難以忘記》攞到。

YouTube2014年度香港十大熱門音樂影片排行榜:
1.FROZEN-LetitgoSing-along
2.周柏豪-《傳聞》
3.天堂鳥-《登陸太陽》
4.單戀雙城主題曲《很想討厭你》-林夏薇
5.少女時代-《Mr.Mr.》
6.DearJane-《一去不返》
7.謝安琪-《雞蛋與羔羊》
8.FAITH-《MamaEasy》
9.張智霖-《你是如此難以忘記》
10.天堂鳥-《Whatyouwant》