【李八方online】任亮憲積極考慮戰港島 有可能繼承王維基選票?
港島立法會補選任亮憲李八方ONLINE王維基
上屆立法會選舉為參選九龍西嘅何志光站台、狙擊黃毓民而重現政壇嘅「維園阿哥」任亮憲,今日突然喺fb上載一段搞笑短片,片中有《任記電視》,「女記者」稱收到消息指,馬草泥有意參選2018年立法會補選,所以追訪喺辦公室做緊嘢嘅任亮憲,片段小標題表明:「任亮憲出戰港島區補選」,而任亮憲又喺fb以「保兩制拼經濟 任亮憲創出路」貼出標語,好似已準備好選舉口號咁噃!
任亮憲接受八方查詢時承認,正積極考慮參加港島補選,話由於今次係補選,唔同一般立法會選舉,相信參選人可以更聚焦喺多啲議題討論,加上自己住喺港島,喺港島工作,過去又以喺維園發聲出名,係不折不扣港島人,香港島亦好多不問政黨、只問是非嘅中間派選民,所以考慮喺港島出選好正常。
對於被指參選會金界走民主派唯一代表、香港眾志周庭選票,任亮憲話唔識界定自己係乜嘢派,又話自己票源未必來自民主派,因為佢份政綱會經濟議題掛師,話如果唔睇名,可能以為係自由黨同新民黨,所以金界走邊個嘅票係好難講,有可能繼承咗王維基上屆立法會啲票都唔出奇!
任亮憲又話,關於政改方面,會主張「騎劫831,搶攻真普選」,話可以喺人大831框架下,爭取將全部民選區議員同立法會議員加入提委會同普選立法會,咁大家就可以埋枱傾喎。佢預告嚟緊會提出一啲香港史上無人提過嘅政綱,一月開始分享更多新片,話今次選戰主要會「用片入屋」方式宣傳喎!
【minigame】2017瘋暈人物 返工打機唔使擇日
http://bit.ly/2CeWQkP