台灣女子組合S.H.E前晚喺澳門開騷，今次係任家萱（Selina）月初宣佈同老公張承中離婚後，首次同兩個隊友陳嘉樺（Ella）、田馥甄（Hebe）合體演出，Selina出場即有歌迷大讚佢靚女，又叫佢加油，Selina就笑住喺台講多謝。
今年係S.H.E組隊15周年，Ella喺台上話呢15年對佢哋好重要，又話佢哋唔會令歌迷失望，由於後日係Hebe生日，兩位好姊妹即場唱生日歌送畀佢，Selina仲用廣東話唱「恭祝你福壽與天齊」，演唱會最後唱到10點，但歌迷全部唔肯走，不停大叫encore，大會要六度廣播兼開燈，觀眾先肯離開。

Hebe鞋踭勾爛裙

而Hebe前晚喺澳門做完騷，噚日搭船嚟咗香港，出席佢6月紅館個唱嘅記者會，着住4吋高踭鞋嘅Hebe，上台時條裙俾自己鞋踭勾住幾乎仆倒，就連裙邊都勾爛埋，現場歌迷就用廣東話唱生日歌同佢預祝生日，Hebe就話生日願望係家人同姊妹們幸福快樂，Ella今年順利生B。
提到Selina𠵱家嘅心情，Hebe話：「心情應該由她來說，多謝大家關心，我們15年在一起，會陪着她。」問佢會唔會介紹男朋友畀Selina？Hebe就講笑話：「我也自身難保，順其自然。」至於紅館演唱會，佢話兩位姊妹唔會做嘉賓。
撰文：馮仁昭