何韻詩(Hocc)去年卸下歌手嘅「包袱」積極爭取真普選,從而令佢收入少咗,不過阿詩直言「餓佢唔死」,今日喺instagram貼咗佢、黃耀明及夏永康嘅合照,原來有人搵佢拍廣告。
阿詩喺ig中留言:「兩個終於有工開,齊齊拍廣告,遇上大師wingwing,個人可以話非常欣賞呢個客戶,正所謂,響呢d(啲)moment,能見真情!感謝支持,希望大家到時都大力支持佢哋嘅產品!」阿詩仲賣關子講:「呢個組合其實仲有一位人兄㗎,估唔佑到係邊個同咩brand呢?」
據知,今次搵阿詩拍平面廣告嘅係香港客戶,預計5至6月就會見街,佢哋之前都曾經合作過。