港股自升破19000大關後，已反覆整固近8日，噚日收19204，跌56點，最低曾跌過138點。今個月，股市大升近千點，做衍生工具嘅淡友，唔好話損失慘重，但輸咗之數，肯定不菲，期指禮拜三結算，唔排除會有大鬥法場面出現。
大市雖調整，但上升股仍有300多隻，呢輪最開心係睇住隻愛股金威集團（910）係咁上，噚日高收1.06元，再升6仙，且日日都大成交，噚日又有1.4億股，睇勢就已經超買，但未知幾時會調整，為求賺到盡，繼續以上移止賺位揸實可也。
越秀投資（123）一發力，果然非同小可，噚日最高更上到2.09元，收番1.92元，跌8仙。急升後調整，好正常，中線仍可睇好。
中化香港（297）在3元上下橫行成7個月，呢輪似乎有番勢，最高上到3.20元，噚日又回返落3元水平，主要係雷曼同高盛兩間大行擺明車馬係咁掛牌沽，但沽盤唔大，好似雷曼，一個位掛兩三個牌，加埋亦只係二三十萬股，睇個樣，似乎係㩒價性質，類似呢種情況，好多時㩒完價，股價就會大升。
中化係中國最大嘅化肥產品分銷同生產商，母公司中國化肥集團的3項化肥業務，去年下半年已話到明會注入去，經過年幾時間，有關注資安排經已大致完成，好快可落實宣布，中化股價近期明顯轉強，不會無因。

注資安排大致完成

3項會注資嘅業務，包括青海鹽湖鉀肥18.5%、山西天脊40%同山東肥業60%權益，全部收購完成後，中化的產能將可由現時的300萬噸增至800萬噸，分銷點由1100個增至08年的2000個，而市場佔有率亦可由現時的12%升到24%，令集團的經營效益大大提高。
中化現時在3元水平整固，噚日出現後抽，在20日線（2.97元）獲支持，近日高位3.20元係阻力，升破後可確認升浪開展，照度上去，初步目標係3.75元。
郭兆誠