女人踏入金色年華會面對唔同問題，葉麗儀同謝寧今日獲邀到中環，擔任一個健康媽媽分享會講者，曾患乳癌並於更年期患上抑鬱病嘅葉麗儀講述經歷，愛入廚謝寧分享自細想創出自家醬料夢想。

講座會後，謝寧指視葉麗儀係佢多年來偶像，對方事業有成，多年又保持健康體態，問到佢嘅「醬料夢」，佢笑住話：「十畫都未有一撇，夢想可以唔使咁快實現，當初我唔識煮嘢時，發覺醬料可以令自己變成大廚水準，所以想有自家醬料幫番人。」

現時身心健康嘅葉麗儀憶述番五十歲時，面對更年期身體變化，一向天生樂觀冇脾氣嘅佢，突然性情大變，不時脾氣差，嚴重時試過覺得死係最大解脫，佢話：「有次去多倫多參加慈善騷，有朝我匿喺被度喊，唔肯起身，老公立即搵醫生朋友做檢查，先知患上抑鬱，嗰個禮拜老公貼身跟實我，收起尖銳利器，經過幾年中醫調理就冇事。」

佢覺得患病時最大幫助係家人朋友關心支持，最重要係正面去面對，盡快求醫就會早日康復。