入行36年嘅美魔女溫碧霞（Irene），51歲之齡首次開個人演唱會，演唱會喺今晚10點半左右圓滿結束。

完騷後Irene接受訪問表示：「真係唔捨得，呢個騷花咗好多心思，做完有啲失落。」講到老公好支持，Irene坦言：「我都唔知佢上台，你真係好好，一直默默支持我，喺生活上又好錫我。」

Irene諗起老公一直嘅包容，都好感動：「尤其是自己咁任性，但老公咁多年都冇脾氣，一直好寛容咁對我，反而自己脾氣仲大，可能父母寵慣咗，加上15歲出嚟做嘢，諗嘢好個人感覺，冇乜睇人觀感，但依家慢慢學識改變性格，諗下其他人，尤其是結婚後多咗時間陪家人，正如頭先同阿嬌講，一個女人幾叻都好，最緊要有錫自己嘅人喺身邊，所以好替佢開心。」

至於幾時再開騷？Irene話：「其實內地傾緊，但要睇時間，自己最鍾意拍戲，演戲放第一位。」問到開一場係咪唔夠喉？Irene話：「一場先啦，咁先矜貴，反應好會繼續做。」

精選娛聞，喺晒《娛果》
http://fb.com/appledailyent