環球經濟轉差，自去年底開始「唇膏效應」（lipstickeffect）又再次翻生，指在經濟低迷時，女士傾向買入輕奢侈的化妝品。最近唇膏效應更加跑贏晒奢侈品，消費者買個LV包包都要諗多兩諗，不過Dior唇膏呢就輕鬆即買。

奢侈品市場，如靚錶、名牌衫及珠寶首飾增長每年遞減，2011年按年增長有12%，但隨後增長幅度越來越細，今年料只增長1.6%。不過另一邊廂，高檔化妝品的增長幅度就越來越大，2011年只按年增1.7%，今年增長估計可達4.1%。

從全球最大化妝品公司L’Oreal的數據可見，高檔化妝品的銷售增長開始拋離大眾及名牌化妝品品牌。化妝品原料供應商Givaudan亦指出，過去兩年有10.1%天然增長來自高檔香精部門，為增長最快的部門。

高檔化妝品增長勁過真奢侈品，除了因為內地同胞買少咗包包外，現時服飾上的潮流不再明顯，令女士們買衫意欲減。另一邊，全世界興起vlogger（影片博客），Instagram上美容vlogger的追隨者數以億計，越來越多人著重自拍效果，所以咪越來越多客由大眾化妝品品牌「升呢」到高檔貨囉！

參考資料：彭博

掌握財經生活資訊，即Like「蘋果ATM」fb專頁啦！
http://fb.com/appledailyatm