每個人都有多重身份，如果命運能選擇，工會幹事何偉航不願意成為「生命小鬥士」，12歲與骨癌搏鬥後變長短腳；如果不是出身鄉村，他絕不想當原居民，被標籤成貪婪一族。選擇自己的路需要勇氣，他帶領碼頭工友抗爭，相信身為教徒要行公義、好憐憫；自小學琴夾Band唱Beyond的歌，夥拍過周博賢出工運碟，「畀我揀，我最想做音樂人」。他深信音樂是上帝賜予的武器，歌曲有感染力，激勵大家在亂世中堅持下去，撐到底，願榮光歸香港。

記者 張文傑

6年多前的碼頭工潮，職工盟幹事何偉航由酒樓「講數」到碼頭罷工，以至包圍長江中心，從不缺席。行動不便的他拿着枴杖抗爭，有人質疑其能力，「我唔係用對腳去做嘢，係用把口、用腦 」。他最感激當日一班工友的信任，「記得喺花園道斜路，好緊急趕住去開會，我叫工友行先，唔使等我，佢哋話『唔得！大家兄弟，一齊行』，呢啲就係『中環價值』以外嘅事」。那年40日的抗爭，他回想起來，仍然感動萬分。

80後的何偉航領導工友抗爭，走上工運之路，源於信仰。他在中大讀歷史系，畢業後於教育局當「打雜」，2010年5.1勞動節遊行翌日加入職工盟，強調這是教會信仰的累積，「我一直覺耶穌其實係左翼人士，聖經都講佢見到唔公義會企出嚟」，加上在中大團契時，有工友獲邀到來分享紮鐵工潮點滴，其時最低工資的討論十分熱烈，造就他投身工會。同年7月，巴士工會爆發工潮，當時主力運輸業的幹事不多，「寫新聞稿、發採通、攞大聲公嗌咪，去九巴車廠約定理事傾，全部一腳踢」。

除了工會幹事、基督徒外，抗癌鬥士亦是他另一個身份。中一時患上骨癌，原因不明，一向愛踩單車、游水、通山跑的「鄉下仔」，人生從此不一樣。「開初都覺得好似傷風感冒咁樣，好快好返，但點知原來係大件事，要入手術室喎，開始知道係一個好嚴重嘅病」。97年4月，醫生將他右大腿骨切除，將屍骨「移植」入去，「傷口好長，之後做7、8次化療」。被迫停學一年的他，住在沙田威爾斯醫院旁的「麥當勞叔叔之家」，方便去醫院做化療，「成個97年差唔多都喺屋企渡過，記得97年7月1日就喺『麥當勞叔叔之家』睇升旗」。由於他腳內的屍骨會慢慢溶掉，醫生當時曾想換成金屬支架，但因傷口經常發炎，不能再做手術。出院時他開始需要穿着加厚的鞋，之後鞋越來越厚，長短腿日益嚴重。

歌曲盛載每個故事

「當時最辛苦係化療，每次係成個星期頭暈眼花又食唔到嘢，又會嘔黃膽水，冇食嘢都會嘔，排晒啲藥先會退，keep住去廁所，呢個副作用係畢生難忘，唔會再想有第二次！」何偉航重提舊事仍猶有餘悸。出院後爸爸每日送他返學，學校無電梯，化療後無頭髮的他逐步樓梯慢慢行，面對同學取笑，加上要重讀中一，受過不少歧視，「以前考頭10名，覺得留班係恥辱」。他現時出街仍不時被人投以奇怪目光，但已不當一回事，並笑言捱過骨癌折磨後已不怕死，「所以碼頭工潮對住一班大漢，都唔怕佢哋」 。

工運與社運從來密不可分，工人抗爭外，何偉航每年也參與7.1遊行，其真正的社運啟蒙要追溯至2005韓農來港反WTO示威一役，跳海跪行、佔領告士打道，「好震撼！自此睇好多左翼嘅書，了解社會剝削、全球化係乜嘢，睇馬克思嘅剩餘價值。」之後是反高鐵運動，他記得當時的文宣是「你有冇試過為社會請一日假？」及後當時還未獲諾貝爾和平獎的劉曉波被判入獄11年，他與教會弟兄一起創作了一首《誰的憲章》，反思中共治下社會情況，這是他首次為社運而作的歌曲。

何偉航自小學彈鋼琴，中學考獲鋼琴8級，曾夾Band做主音彈keyboard，樂隊名叫「Activist」，「我哋中文叫做抗爭者，當時已經有反建制意識，但嗰陣係反對學校制度。90年代尾彈Beyond《灰色軌跡》、《活着便精彩》，模仿家駒嘅《再見理想》，作咗首《衝破理想》」。傘運後他與曾支持碼頭工潮的音樂人周博賢合作，在成本不多下，組織素人Band友及工友，製作首張自主工運大碟《野火》，亦舉辦過音樂會，部份歌曲的曲詞由他一手包辦，曲風偏向流行曲，容易上口，其中控訴香港沒有標準工時的《辛酸》，講工友捱更抵夜心聲，不時在電台播放；另有《工會人》，鼓勵戰友堅持理念撐下去，不要放棄，「我自己比較鍾意講集體談判權嘅《農村包圍城市》，每一首工運歌都重要，都盛載一個故事」。

不過，近年只要在社運場合中唱歌，就被定性為左膠行為，何偉航並不同意，強調音樂有力量，群眾感受到力量，就有激勵作用，「音樂係上帝畀嘅武器，有力量可穿透人心」。他明白，緊張關頭不可能只顧唱歌，但試過在一些集會唱Supper Moment《無盡》，感染到大家堅持下去，「歌詞好應景，有共鳴，會令人諗番初衷」。他又舉例指，早段的反送中運動，教徒抗爭唱詩歌「哈利路亞」，透過音樂力量去感召對方，同時代表堅忍精神，「唱幾個鐘，好似示威者保護罩，喺香港係前無古人，好多傳道人、牧者都估唔到有咁嘅效果」。所謂「行公義、好憐憫」，他說層面可以好闊，不只限於扶長者過馬路，當社會制度有問題、冇制衡之時，只要不影響生命，就應該用行動去表達不滿。他一直覺得耶穌本身也是激進派，有不滿會先講道理，「講唔聽就可能會掃冧一啲嘢，呢啲係義憤，唔係純粹暴力；反送中出現用義憤反映公義，唔同鄉下佬嗰啲純粹野蠻暴力」。

用流行文化推動社運

何偉航非因7.21元朗恐襲事件才不滿一些鄉民所作所為，事實上他本身就是西貢高塘村原居民，可是年紀越大，越發現新界部份原居民的貪婪醜惡，「有啲村嘅鄉紳，祠堂都可以賣，點解我會係呢類人？」恥與為伍，然而他知道民主派、左翼內擁有這身份的人不多，理應用以此身份站在民主角度去說話，反對鄉議局一言堂，向公眾展示原居民也有思想、可以爭取社會公義、建設社會，故他早前決定從政，參選村代表選舉，但落敗而回。

連同參政者等6個身份中，何偉航最愛是業餘音樂人這個角色。他坦言原居民身份是「天生」的，抗癌鬥士肯定冇人想做，如果不顧慮生計、不用抗爭，希望可以24小時對住結他、鋼琴，「喺海邊唱歌，得閒去外國Busking咁就最好啦！」回歸現實，現時主力負責工會教育的他，希望明年職工盟30周年再搞一次音樂會，多些從流行文化角度去搞社運工運。周博賢曾說：「世界不會一刻間就可以改變，但音樂起碼細水長流，能累積一分力量。」他亦認為講工人心聲的歌曲不一定沉悶，只要有穿透力、講到大家心聲就會受歡迎，C AllStar、古巨基甚至陳奕迅都有講工作辛酸的歌，希望主流歌手可創作更多同類歌曲，「林海峰《我今朝有啲唔舒服》，話假期少工作量大，每逢周一都唔想返工，咪可以引伸到勞工權益問題囉；古巨基《亂世情侶》講長工時，OL及夜班物流公司職員拍拖10周年當晚仍要OT，『未來又怎麼敢想下去，一起要預了挨世界不易』，仲有陳奕迅《老細我撇先》，『日日要定時出現加班多過睡眠，我今晚需要叉電別再急CALL等我出現，冇電冇電』，都好貼地」。

何偉航身份多，目標亦多，想再與戰友出碟、再讀書、繼續參政，亦想身體進一步改善，「冇人想長時間行動不便，想隻腳換成金屬關節，但手術唔係想做就做，要同醫生商量」。他對做手術不太心急，強調除了跑步踢波，很多事也可自己完成，一個人去旅行亦無難度，去過歐洲、波羅的海、墨西哥、古巴，「去親都成個月，鍾意慢慢行慢慢影，一個人旅行，不關乎能力問題，係勇氣問題」。與很多香港人一樣，經歷高低起跌，能夠撐下去，就是靠無比勇氣，有勇氣就有力量。

-----------------------------
【撐學生】
召集有心人 撐學生全年睇《蘋果》
立即按此
-----------------------------
百日特刊記載香港人逆權之路
《逆權百日》
-----------------------------
《囚牢之疆》 專頁
揭開集中營邪惡面紗
今日新疆 明日香港