喺周五舉行嘅澳洲網球公開賽，五號種籽、俄羅斯球手舒拉寶娃喺女單第三圈，以2:1淘汰美國嘅羅倫戴維絲，晉級16強；不過佢前男友狄美托夫就冇咁好彩喇，喺同日嘅男單第三圈以1:3不敵三號種籽、瑞士嘅費達拿。（now670及671台今日8:00am直播）
舒娃喺女單第三圈以6:1、6:7、6:0擊敗羅倫戴維絲，拎到職業生涯第600場勝仗之餘，仲成功打入16強。呢位28歲美女球手賽後話：「雖然我喺第二盤有啲鬆懈，但好彩喺第三盤搵番狀態。」舒娃仲話：「我傷癒復出之後，就覺得自己依然咁鍾意打網球。」
舒娃之後就到佢前男友狄美托夫嗰場男單第三圈，咁啱就有鏡頭影到佢同費達拿等上場嘅時候，喺更衣室部電視睇舒娃場波。唔知費達拿係咪想玩心理戰擾敵，起勢咁幫舒娃打氣；結果，狄美托夫以4:6、6:3、1:6、4:6輸咗，呢場仲係費天王第300場大滿貫勝仗㖭！

再爆出四場造假賽事

另外，網球壇打假波一案又傳出有四場懷疑造假嘅賽事，英國球手布恩菲爾（Richard Bloomfield）係其中一名涉案者。布恩菲爾喺2006年溫布頓首圈對貝洛基，當時前者世界排名259位，而後者就排89；咁嘅牌面令喺博彩公司Betfair買貝洛基贏嘅賭注，就高達34萬鎊（約377萬元），不過布恩菲爾最終爆冷直落三盤勝出。