全球史上至大新股嘅工行（1398），噚日由董事長姜建清帶頭，喺內地開咗個網上投資者推介會，主題梗係向未來股東推銷工行有幾咁吸引啦！之不過，並唔係人人認同，其中網民洋洋就話，睇過好多投資機構向客戶作介紹時，都以「中國的滙豐」或「明天的滙豐」嚟形容工行，查實呢個係天大嘅誤會喎。
洋洋話，工行同滙豐除咗體積都「大」之外，無論在財務數據、經營團隊、公司文化、公司治理同埋風險管理能力方面，都幾乎冇得比。就好似火雞同鳳凰，除咗件頭差唔多，兩者本質根本唔同，呢兩間銀行嘅客戶實在太有順民同上帝呢種天上人間感覺。

換殼仍是老爺車

佢話，工行搞股份制同埋上市都搞咗幾年，但完全唔覺有咩變化，依然排足兩個鐘頭隊，服務意識超薄弱；相反，滙控teller就會主動畀客戶最靚嘅價，經理亦叫得出佢個名，唔使特殊關係，亦唔需要送禮。
形容內地銀行上市如「老爺車淨係換咗個殼」嘅佢話，如果香港啲分析員唔信，可以親身感受吓。不過彈還彈，佢依然會認購，博工行首日升番10到15巴仙，執番啲喎。至於網民比爾蓋硬就建議，內地小股民有閒錢可以認番啲，因為中籤率可能會很高，有門路嘅投資者，不妨將3成資金響香港認購，皆因可能一人有一手喎。如果抽得中就要首日即沽，事關佢估首日漲幅至多只係8到10巴仙，所以最好咪做孖展。