賭王四房孻仔何猷君同新加坡富家女千金林慧俐(Kimmy)轉玩地下情,Kimmy前幾日仲秘密嚟咗香港會男友,不過佢就搵埋兩個女性友人四人行轉移視線,皆因佢簽咗韓國藝人公司要將感情事低調mode處理。
Kimmy留喺香港仲未走,繼續密密見男友,噚日佢哋呢對拖友就撇甩之前嘅電燈膽,再喺中環置地廣場shopping。
當時大概4點幾,一身運動裝、Cap帽打扮嘅猷君同Kimmy,就喺時裝店Carven幫襯緊——主力係Kimmy買嘢,猷君就乖乖陪女友。
兩人逗留咗15分鐘左右,就埋單走人。少爺仔猷君仲負責為女友拎戰利品,見佢一手拎住兩個紙袋、一手拎住電腦同杯凍飲,都顯得有啲手忙腳亂。兩人走嗰陣平排而行,加上猷君兩手都唔得閒,未有手拖手,期間見到佢哋一杯凍飲兩份飲,Kimmy飲完飲品,又將個杯遞返畀猷君拎,佢就夾住個手袋電話相當瀟灑。
佢哋兩個原來轉場,仲玩搭地鐵,落到中環港鐵站,兩個都冇八達通喺身,Kimmy就負責買車飛,期間猷君從旁幫手,兩人頭貼頭、咬耳仔,猷君仲搭住Kimmy手臂笑笑口,似乎對買港鐵飛感覺好新鮮。
由於佢哋搭港鐵時正值放工時候,車廂迫滿人,兩個企係車廂入面都好避忌,猷君仲好有警覺不時望身邊。二人搭到去九龍站出閘,再去圓方行街買嘢,不過佢哋行咗一陣,就未有收穫。