韓國樂隊FTIsland主音李弘基擔正嘅劇集《百年新娘》，噚晚已經播咗大結局，而基仔都一身鬆晒，可以得閒玩吓佢至鍾意嘅滑板。

基仔喺首爾被發現以襯到絕嘅花褲、花鞋，踩住花花滑板返公司。粉絲喺門口等咗三粒鐘之後，基仔終於走人，不過唔係行，係繼續好型咁踩着滑板，粉絲唯有喺後面狂追，最後基仔都好好人，肯停低幫粉絲簽名。當佢知道有人來自內地時，佢即刻好搞鬼咁亂講普通話：「你好，你吃了嗎？」