特首選舉的小圈劇，拍到家都已經無本可依，總之就似黑澤明嗰套戲名：「亂」，但係點樣埋尾？睇怕都冇乜邊位高人夠膽買定離手，就算係本版猛男都淨係「人頭博豬頭」，賭「鷹哥」終成「玩猿」，但都冇話誰人可以笑到最後。實情係中央換班在即已經緊張兮兮，黨內暗鬥從來更加凶險萬分，再有政委「勃起來」又臨陣失場，真係自顧不暇，班愛國愛港人士仲要喺度添煩添亂，真係多得佢哋唔少。

經此一役，我姑且大膽估計，中央有機會把心一橫，由得啲牛鬼蛇神同室操戈，自生自滅。正是名正言順，勝者為王，亦藉機將商賈財閥的政治話語權重新畫餅。
回歸以來，社會日益分化，仇富現象嚴重，還不是因為利益過份集中，政府施政同樣傾斜，而建制中人則甘為高牆腳下草。國家發展之初，還有讓一部份人富起來的理據，香港早已是經濟發達的城市，根本就沒必要造就「富者越富」，而目下社會深層矛盾加深，衝突無日無之，當日甚麼「安定」之說早已無影無蹤。中央若能放心放手港人治港，就算係民記或地下共黨又有何妨？當然如此破格想法，雖未至於天方夜譚，但總是自己的一廂情願，也就是身處鬱悶困局才會擠出的錯亂思路。
由此路進，我亦不妨大膽表白，雖然亦只係一個無權無票嘅普通港人自作多情。唔該曾鈺成先生，你係要出嚟選就爽快利落啲，老實講我對你真係冇乜好感，但你點都唔會細眉細眼，入咗個圈就當正自己贏哂。再者你都真係願意拋個身落場去砌，經過洗禮願選服輸。出得嚟選，冇可能係「君子」，不過最起碼你都尊重遊戲規則。而我從來明白真正的選舉（呢次唔係）不過係揀一個相對冇咁差嘅人，而佢亦都有機會做到你想佢做到嘅嘢，多害取其輕，我係好天真好儍嘅希望五年後都依然會投票畀你。

至於自命「淑女」嗰位，我淨係諗起梅姐同名嗰首歌嘅最後歌詞「所愛所要所有，莫說今宵，永久的等那明天。」莫講話要「放長雙眼睇」，有生之年我都唔想睇到，「你係淑女，唔好搞我」！
盧先亞