朱千雪（Tracy）今日喺尖沙嘴出席Godiva中秋節活動，親手製月餅，嚟緊中秋節，Tracy話會同姨媽姨丈共度，佢話：「因為爸爸媽媽唔喺香港，喺香港最親嘅就係姨丈姨媽，所以每年都會一齊食飯。」咁醫生男友Justin會唔會一齊過？佢話：「佢喺新加坡，本來呢個星期飛返嚟，但係因為颱風，航空公司一早通知要取消，唔緊要啦，下個周末、再下個周末都可以嚟㗎嘛，為咗呢個颱風，我已經儲定嘢食，餅乾、麵包同朱古力，唔知打幾耐，怕喺屋企會悶，咁多年都未試過買膠紙，今次都買咗。」

問Tracy怕唔怕變肥？佢話：「又唔會打一、兩個禮拜，都係一兩日。」Tracy依家努力讀緊法律博士，問佢係咪肥咗？佢就話：「唔知，人人講嘅嘢都唔同，我有排都唔會上磅嘞，唔係唔敢面對，因為一至五所有時間都喺學校，冇機會做其他嘢，冇謂上磅唔開心。」提到好多港姐師妹都紛紛結婚，問到幾時輪到Tracy，佢話：「唔急，唔係人哋結我就要結，大家都忙，要就時間，度吓期先，我哋冇乜點傾。」

精選娛聞，喺晒《娛果》
http://fb.com/appledailyent