噚晚世界盃揭幕戰，俄羅斯VS沙地阿拉伯，最終5:0完勝，結果俄國佔盡主場之利，由頭贏到尾。俄仔Ansheles隔空出心為國打氣，果然有用，不過「古靈精怪估波團」四位嘉賓林作、八両金、黃夏蕙同俄仔Ansheles中，俄仔Ansheles同夏蕙BB都估中俄國勝，但波膽就未有估中。

聽日凌晨葡萄牙對西班牙，兩隊都係實力派，勢勻力敵，球迷真係要擔定櫈仔觀戰，相信呢場賽事都好有睇頭，到底葡萄牙嘅靈魂人物C朗會入幾多球呢？畀大不妨聽下林作、黃夏蕙、八両金同俄仔Artem Ansheles為《蘋果》組成嘅「古靈精怪估波團」又有乜嘢貼士。

【葡萄牙VS西班牙】

1:0
黃夏蕙：葡萄牙VS西班牙，因為葡萄牙有個靚仔叫C朗，梗係贏啦，我好鍾意靚仔嗰喎，你哋大家都鍾意靚仔㗎。我睇賽果應該1:0。

3:1
八両金：葡萄牙VS西班牙係「雙牙之戰」，牙擦擦，我比較鍾意食葡撻嘅，當然鍾意葡萄牙多啲，我估波膽係3:1。

1:2
林作：葡萄牙打一個人嘅啫，就係C朗，其他球員講真冇幾多個係頂級球隊效力，又或者甚至乎打得出名嘅。西班牙就唔同，西班牙近年越嚟越似德國，個個球員本身好有實力之餘，仲要好鬼夾成隊波。今屆係恩尼斯達最後一次世界盃，之後去日本，所以我睇好西班牙今次會特別比以前團結，贏硬2:1。

4:0
俄仔Ansheles：西班牙打足球好勁，梗係佢哋嬴葡萄牙，4:0。

一網睇盡
足動世盃 直擊俄國最前線
https://hk.feature.appledaily.com/worldcup2018/