林公公升官發財，政制及內地事務局局長一職由前特首辦主任譚志源臨危上陣替補。呢個三煞位，邊個坐都唔慌好受；難得譚志源咁肯捱義氣，乃念佢「義」字當頭，立法會議員都網開一面，噚日喺立法會政制及內地事務委員會上都對首次到訪嘅新局長口下留情。
民主黨副主席卿姐不諱言同林公公嘅交往向來衰到貼地，希望同新局長關係唔會咁惡劣啦；唐營頭號啦啦隊主將林大輝就直指局長個位唔好坐，唔知應該恭喜佢抑或戥佢難過，某程度應該講中譚志源心聲。林公公最出名嘅錄音機功效兼遊花園，議員就呼籲譚志源咪學，否則唔使講後果，大家有眼睇㗎喇。