國家副主席曾慶紅來港睇怕都成事囉，因為噚日友好行家連佢抵港日期都有埋，就係由下個月九號至十二號，嘩，嚟成四日，可知佢唔止係為迪士尼而嚟，一定有好多人要見，好多事要做，好多嘢要講。
其實曾慶紅一早喺7.1香港回歸八周年已經想嚟挺佢同宗，但係當時冇人敢拍心口話只得好少人遊行，於是曾副主席覺得唔多好，不如遲吓再算，反正機會大把。
有人同八方講，長毛梁國雄到時可能出咗埠去考察，如果係真，曾生最高興，不過，冇男長毛仍然會有女長毛，重有啲乜功物功，曾副主席都係有啲心理準備好。

達仔起草求見信

講番民主派，佢哋已經命令白鴿黨主席李永達起草一封求見信，張文光話，民主派上京就話難啫，冇理由副主席落到嚟都唔肯見佢哋。係喎，八方都記得曾慶紅今年初講過同民主派都有得傾之類嘅冠冕堂皇說話，𠵱家點可以扮失憶？更何況曾副主席見慣大場面，中國大陸咁多人都搞得掂，使鬼怕幾個香港土產民主人士？
講開求見信，民主派當然要先開番個武林大會，叫齊白鴿黨、45條關注組、前綫、民協等等，就香港政制發展有個共識，先至好同曾副主席講，或者同佢細佬曾特首討價還價，反正香港已經進入由北京同香港一齊共管特區年代，唔問過阿爺，煲呔同肥龍點敢輕舉妄動。
八方聽聞，民主派最希望就係訂出一個上下底線，「上」就係繼續爭取07/08雙普選，「下」就係就係不能倒退，就算原地踏步，都要有改善餘地。民主派人士話，佢哋今次一定唔會易上政府當，因為一旦為咗增加直選議席而答應加功能議席，就係搵自己笨，所謂加就易，刪就難，到時要全面直選，咪增加難度，當然改善功能組別同大選舉團嘅代表性就唔同！
講開煲呔，佢老哥呢輪正就施政報告見各界人士，不過，噚日見卿姐，就好似有啲不歡而散，卿姐竟然話佢重差過老董，你話係咪好搞笑，唔怪得民主黨都唔急要見佢。

九月準備考煲呔

白鴿黨啱啱先見完肥龍，所以就推咗煲呔八月底嘅會面，改至九月六日，到時應該人齊啲。佢哋準備考吓煲呔牌，事關鄭家富已經做好咗份最高工時嘅私人草案，會當面請曾特首批准佢哋提出，煲呔參選時乜都得，睇吓佢點轉彎？

傳真︰2623-9278
電郵︰[email protected]