「大師」林大輝仲做立法會議員時講過,感情上支持「薯片叔」曾俊華參選特首,但佢早排又加入咗「奶媽」林鄭月娥競選辦主席團,令人奇怪大師撐薯片定奶媽?林大輝噚日同傳媒拜年時解釋,話佢既支持奶媽、又鍾意薯片,就好似可以支持阿仙奴,但同時又鍾意曼聯一樣,真係令八方有種聽佛偈嘅感覺。
大輝話同奶媽私交唔多,但奶媽上月12日辭職並宣佈有意參選特首後,翌日(1月13日)來電請佢喺特首選舉幫手,令佢覺得奶媽好有誠意,所以唔使一分鐘就答應咗。
大輝又話,自己同薯片叔私下食過好多次飯,有好多共同話題,雙方一直係朋友,但對方未有正式邀請佢加入競選辦,雖然佢撐奶媽,但同薯片叔仍不時就政綱內容溝通。