前港姐季軍王愛倫的兒子林建億（Chester），憑其俊俏外型及富二代身份而成為城中筍盤，而愛蒲嘅佢係夜場常客，日前近午夜時份，《蘋果》喺中環撞見林建億揸住架紅色車，由荷李活道載住兩名外籍女子去名人蒲場FLY飲酒，相信佢哋係蒲完蘭桂坊，然後揸車轉場到雪廠街繼續消遣。

落車後，林建億邊撳住手機，兜過車尾行上行人路，兩女特登企定等佢，林建億未見立即有咩攬女動作，反而去行去車頭、左邊前胎位置踎低，不停用手篤吓篤吓，似係檢查車身定車胎有冇受損，唔知係咪佢之前揸車啲「偕」到架車，所以見到好似好緊張咁。其間林建億又撳咗一輪電話，期間有打畀朋友，但好快收線，同行嗰兩位外籍女子見狀，就行埋一邊喪傾偈。

之後林建億背靠車身，疑似send短訊搵人求救，兩名外籍女子都有上前關心，不過好似幫助唔大。

5分鐘後，林建億帶住兩洋妞行入酒吧，佢行前去嗌嘢飲，隨後頭髮較深色嘅外籍女仔同已經在位嘅男友人錫面打扮呼，反而金色頭髮嗰位就齋企後面冇動作。冇幾耐，店內有人發現記者偷拍，通水畀林建億知，林建億一知道即刻彈起身，帶住兩洋妞速離現場。

根據車輛登記資料，林建億揸嗰架AUDI，喺2014年出車，登記車主係一間叫寧寶貿易有限公司（RUBLE LTD），註冊地址係中環畢打街，董事係林倍萬。