701收料站:寶業暫不宜沾手

蘋果日報 2004/04/28 00:00


雖然噚日大市好似喘定,但成交就萎縮得好緊要,反映大家都唔想做嘢。
其實小初好多經紀朋友,最近都call客孖展追到失暈,所以就算有人拍晒心口話想做嘢,小初都好懷疑做唔做得到,就算真係炒咗上去,散到貨機會亦唔大。
小初舊年曾經玩過嘅寶業集團(2355),最近因為延期公布業績,所以股價不斷下跌,噚日再跌9.9%,收3.175元,較上市以來高位5.10元,已經跌咗好多。
小初心思思想博反彈,但經紀黃叫小初咪亂嚟,點都要等公司出咗業績,睇清楚先算。寶業呢隻民營建築股,舊年6月上市時並唔太受人注意,直至金手指一再增持,股價先至有如坐火箭咁直升,但一隻新簇簇嘅股票,上市唔夠一年,首個全年業績都話要延遲公布,實在甚為罕見。
通常公司延遲公布業績,主要係因為核數師想要多啲資料,事件好容易令人有好多諗法,所以都係睇定啲。
慕容小初