特區政府駐京辦主任梁寶榮四九年九月十八日出世，剛好同祖國同年出世，本來佢選咗舊退休制度，舊年九月佢足五十五歲，夠晒鐘同政府說再見，但係老董搵唔到人，叫佢捱多一年義氣。
一轉眼，一年又到期，老董唔見咗，換咗煲呔，始終未搵到人肯上京接任，但係Bowen唔可以做一世㗎，於是有堅料話今個星期應有宣布，佢老哥正式光榮退休，同佢一齊退嘅重有眾人媽打李麗娟。

可能重未走得住

八方寫到呢度都信心十足，點知有位老友噚日下晝由北京返港，佢話京城最新消息，係寶榮兄又唔走得住，所以連上周嘅送別宴都取消咗要押後，吓，又會咁嘅？孰真孰假，真係要有待下回分解，唯一八方肯定嘅係佢老哥一定會招呼埋新老細煲呔嚟個星期五上京參加抗戰勝利六十周年紀念活動，之後點，就只有佢同煲呔知。
梁寶榮都算好命，簡直係異數，九二年佢曾經做過肥彭私人秘書，回歸後，做咗一年規劃環境地政局局長，九八年底就被調上北京做第一任駐京辦主任，當時有人大叫有冇搞錯，點可能派肥彭愛將去到天子腳下當官，點知佢一去六年，做咗兩個任期多都未走得（即係頭尾近七年），你話服唔服。
識Bowen嘅人形容佢上京時普通話十分普普通通，𠵱家梗係好流利啦，至於經過六年多嘅艱苦經營，佢喺國內嘅人脈關係亦好唔錯，有啲省市嘅領導都係佢好朋友，呢啲當然係佢將來棄官從商嘅好本錢。有幾艱苦？咪一晚走三餐囉，大家都知，喺中國人社會講畀面，人一定要到，哪怕你只停三分鐘。

好彩山高皇帝遠

梁寶榮當年打開局面肯定唔容易，好彩佢帶埋老婆上京，有另一半支持，有人笑佢好彩，因為所謂山高皇帝遠，佢人在北京，老董喺香港搞到天花龍鳳都唔關佢事，最後用大陸術語講係軟着陸，光榮退休。
八方聽聞梁兄最想去西藏一行，可惜未能成事，如果煲呔唔放人，咪去行一行先走。Bowen為駐京辦喺西城區起咗間三層高嘅獨立樓房都算有眼光，今日北京樓價升晒，同特區賺番唔少。呢個世界永遠有人辭官歸故里，有人漏夜趕科場，人哋寶榮兄趕住去搵真銀，所謂情至義盡，煲呔都應放人去過冷河啦。


爆料熱線：29290000、27860099
報料傳真：26239278
報料電郵：[email protected]