繼內房股、商品股之後，呢一轉終於連汽車股都炒埋，熱炒板塊幾乎輪流炒過晒，除此之外，部份強勢板塊滄海遺珠，又或者係非強勢板塊嘅龍頭股份都係唔錯選擇，唔一定要死追爛追吉利（175）、舜宇（2382）。

先講強勢板塊滄海遺珠，ASM太平洋（522）半年業績不幸見光死，皆因一句展望講到「預期後工序設備及物料業務分部的新增訂單總額將順應季節性因素而自本年第三季度開始減慢...相信SMT解決方案業務分部於第三季度的新增訂單總額將取決於智能手機客戶就SMT設備的訂貨時間，而較第二季度可能錄得低雙位數百分比的增長。」兩句說話令股價急挫，由120蚊跌到接近90蚊先見底。

大家憂慮到ASM太平洋第三季表現，但股價咁跌法已反映不利因素，事隔個半月亦已逐漸消化沽壓。反觀未來OLED技術大行其道，新iPhone推出，其他品牌手機會照跟iPhone模式，會刺激半導體及封裝設備需求，利好因素有待反映。

長遠利好因素仲有汽車業務方面，因為自駕汽車對半導體要求遠比手機更多，對於ASM太平洋嚟講係長遠大大商機。仲要加埋公司回購4%股份大計支撐股價，預測今年市盈率18.2倍，博佢學瑞聲（2018）、玖紙（2689）股價急插過後再破頂，絕對有水位。

晉佳

蘋果財經，關心你飯碗
http://fb.com/appledailyatm