黎智英還柙|子女與陳日君探望 黎庭上聽到「Jimmy加油」感動不已
黎智英荔枝角收押所第十一日
黎智英女兒表示,按懲教署規定每月帶入收押所的日用品及零食等有所限制,所以暫時未有再帶日用品及食物給父親。她指會問黎想看甚麼書籍,稍後再帶來。黎女及黎見恩逗留1個半小時後離開,黎女轉述父親稱,昨日在庭上見到眾多人,聽到有人叫:「Jimmy加油,老闆加油」後很感動。黎見恩亦指父親好精神,「佢好多謝大家支持,好感激,佢比我上次見佢開心咗好多,我哋唔需要咁擔心。」
被問到黎智英被加控勾結外國或境外勢力危害國家安全罪,會否擔心黎會被送中受審等問題時,黎見恩稱,現階段不便評論,「冇前科可以睇,所以好難講。」但他補充:「始終要對香港有信心,最壞情況大家都知,所以希望唔好發生」。
此外,早上9時許,天主教香港教區榮休主教陳日君樞機亦抵達收押所,至11時許離開。陳日君樞機稱今日到來送聖體,他指今日是喜樂主日,故他與黎智英一齊讀聖經,「讀依撒意亞先知(書)、讀(施洗者)約翰的故事......(約翰)說這是曠野裏的聲音,我不是陌生人......呢啲好有教訓,佢哋叫大家悔改啊嘛」。他亦指黎智英「佢好好,冇事;好安樂,大家可以放心」。(記者註:在聖經中,施洗者約翰在約旦河中曾為不少人包括耶穌施洗禮、勸人悔改,後來他因公開抨擊當時的猶太王希律·安提帕斯被捕入獄,並遭到處決。)
現時港版國安法被質疑「無所不管」兼未審先判(被告動輒遭長期還柙不准保釋),記者問陳日君樞機作為神職人員,會否擔心日後與外國交流亦有機會被冠以危害國家安全的罪名?他笑言:「可能驚驚哋啩,全世界都係兄弟嘛,交流好正常。不過唔好講錯嘢啦,唔好叫人制裁唔知乜嘢啦,我哋都好驚制裁,如果話港紙同美金脫鈎呢?我哋慘喇,我哋啲錢就唔值錢。」他指會叫天主教徒祈禱,「使到大家冷靜啲,做啲理性嘅嘢。」
天主教香港教區榮休主教陳日君樞機早上亦前往收押所探望。
-----------------------------
-----------------------------
-----------------------------