隔牆有耳:蔡嫻歎名菜 - 李八方
官字兩個口,但係講完又講都冇下文,煲呔主持個經濟機遇吹水委員會係最新樣辦,食家蔡瀾睇唔過眼,二話不說向政府建議,想喺天水圍辦個美食坊,創造就業機會,振興本土經濟,一舉多得。可惜官員唔稀罕,回敬個檸檬畀蔡生嘆。
蔡生同八方講,佢早前去流浮山食海鮮,路經天水圍發覺該處環境唔錯,由市區揸車去唔係太遠,遂興起開大牌檔念頭,加上天水圍有好多新移民,佢哋來自五湖四海,如果人人炮製家鄉菜饗客,包羅大江南北菜式,應該幾有吸引力。
呢個構思聽到都滋味,蔡生卻話官員聽完冇乜表示。其實發個大牌檔牌、廉租地方畀小市民開檔搵兩餐都係德政,唔知點解好似咁難搞,反而工聯會嫻姐一聽就認為呢餐係大茶飯。嫻姐同八方講,天水圍區內人浮於事,蔡生嘅建議可以提供好多就業機會,如果搞得有聲有色,隨時成為特色景點,悲情城市除名,變成知名食肆。
對於呢個「蔡嫻美食坊」,八方樂見其成,嫻姐透露佢已聯絡勞工及福利局局長張建宗,要求政府盡快開綠燈。年前天水圍家暴悲劇頻生震驚全港,政府開始做補救工夫,其中一個措施就係利用濕地公園附近一塊地做啲嘢,高官更帶埋一大班商家實地視察。發展局上月初公開徵集意向書,任何計劃只要可在天水圍提供就業或培訓機會、加強居民服務、為社區注入活力及吸引遊客,都會獲考慮。有興趣人士可於12月12日正午12時前將建議送交發展局。
據知「蔡嫻」未正式提出建議,八方希望佢哋早日付諸實行。嫻姐唔做議員一樣咁忙,因為近日好多打工仔飯碗不保向佢求助,令佢想「臨老入書叢」報讀課程嘅計劃都要暫時擱置。嫻姐一向關照基層,多次建議政府開放小販區、大笪地畀小市民自力更生,幾年前喺黃大仙搞咗個騰龍墟出嚟,外界讚彈不一,八方希望「蔡嫻」今次取長補短,唔好嘥料。