當年今日

  葉澍堃好頭好尾 - 李八方

蘋果日報 2006/09/04 08:00


煲呔唔認埋緊新班底,但係周街都喺度指手劃腳,估邊個司局長有得留低,八方聽聞,阿松同班同學,即係73年港大畢業生,各有各發展,有人冇得留低,有人就有得留都要走。
其中一個係有名你叫嘅大蛇葉。話說葉澍堃局長一向識得用力,唔會亂出招,唔好以為佢唔做嘢,其實私底下將啲問題一個一個搞掂,絕對唔會為老細添煩添亂,呢種伙記好難搵,加上佢老哥係AO出身,煲呔更加愛惜,於是就向佢示意可以留低多做五年,同佢共同進退。
老葉收到訊息當然高興,至少一洗以往不受重用嘅怨屈氣,不過,喺權衡輕重之後,八方聽聞佢老哥都係唔想繼續玩,寧願好頭好尾,做完一屆問責局長,就安全着陸,陪多啲老婆同家人。
咁又啱喎,葉局長當年離開公務員編制已經收咗一筆成千萬嘅分手費,呢幾年又有進賬,一邊又有長俸食,咁辛苦又為乜呢?煲呔口中話唔夠人,其實大把人漏夜趕科場,邊使愁。