21年嚟堅持平反六四嘅支聯會主席華叔，因為支持民主黨改良方案而受到辱罵，令前學運領袖王丹都忍唔住護航，喺facebook留言叫大家無論係咪支持民主黨方案，都唔應該上綱上線到「背叛」同「出賣」層次，更加唔應該人身攻擊。

不斷重複發表反華叔言論

點知呢番話一出，竟然惹嚟唔少人向王丹個facebook進行「洗版」行動，不斷重複發表反華叔嘅言論，例如網民「NobodyNowhere」就不斷發文，不點名反問護短係中國人特質抑或奴性表現，又引用華叔「你係豬定係狗？可以賣嘅咩？」名句，批評佢詛咒過去嘅支持者。雖然都有網民和應呢種言論，但洗版嘅行動亦都令某啲人感到厭惡。有網民就話Nobody呢種洗版行為同民主黨打手一樣討厭，作風似五毛黨多過社民連。
身兼支聯會副主席嘅李卓人都留意到王丹facebook被洗版，希望外界唔好佔用人哋平台獨沽一味討論特區政改，強調支聯會向來支持言論自由，希望所有民主派支持者包容唔同意見，唔好人身攻擊。