韓國上位女團TWICE嘅日本成員Sana早前被影到扶起跌倒粉絲，被讚暖心後，上周六另一日本成員Momo演出時就被粉絲大讚專業，就算甩衫都依照面露微笑，堅持完成演出。

上周六TWICE舉行見面會會粉絲，當日除咗為粉絲簽名外更表演出道曲《LikeOoh-Ahh》，令粉絲尖叫聲不斷。網上流傳一段當日TWICE表演《LikeOoh-Ahh》時嘅片段，成員Momo身穿黑色短身上衣加牛仔外套，再配上短褲，大騷好身材。不過未知係咪件衫綁得唔夠實，喺Momo跳跳吓舞時突然鬆咗，喺舞蹈動作下件衫仲Fing嚟Fing去，更露出黑色打底衫。

突然發生咁嘅事令Momo都堂皇咗幾秒，不過佢並冇要求停音樂，待件衫整返好先再表演，而係用一隻手拉住件衫就繼續表演。雖然同團台灣籍成員周子瑜有打算幫佢整返好，但都係整唔切。而且Momo並冇因為甩衫而表現得尷尬、慌張，仲一直保持微笑，而舞蹈動作更不減力度，直到表演完畢先喺成員嘅幫忙下整返好件衫。而片段立即引起粉絲同網民嘅關注，紛紛留言大讚Momo夠專業同冷靜。