彭浩翔執導、黃曉明同周迅主演嘅《撒嬌的女人最好命》呢幾日上緊優先場，睇過呢部戲嘅觀眾都話部戲可以話係內地版《春嬌與志明》，不過就諗唔到「志明」余文樂真係走咗去客串。樂仔客串嗰場戲好搞鬼，呢場戲係講周迅拍黃曉明酒店房門，刷緊牙嘅曉明走去開門，點知刷牙開門嘅人變咗係樂仔，周迅完全估唔到樂仔會入鏡，所以即時嚇咗一跳，而全場笑爆。

問到樂仔點解會客串，佢話：「當時《撒嬌》喺上海拍外景，我又咁啱喺上海拍《閨密》，所以得閒就去探班，咁阿彭就捉咗我客串扮曉明演嘅角色小恭，當時一開門見到周迅個驚訝表情，我、曉明同阿彭都忍唔住大笑，真係好好玩。」