當年今日
關於我們

不滿賽果兼被寸
柏芝冇獎環球轟新城不公

蘋果日報 2002/01/01 00:00


新城勁爆頒獎禮前晚舉行,雖然被指分豬肉,但仍有歌手食白果,其中張柏芝沒得獎還被司儀暗寸。環球唱片陳少寶昨開腔表示不滿,指柏芝因不出席而沒有獎。
新城勁爆頒獎禮前晚在會展舉行,頒發五十七個獎,幾乎人人有份,惟分手情侶張柏芝、陳曉東齊齊食白果。當中張柏芝不但沒獎,還被司儀暗寸。

被寸「白行」
前晚司儀快、慢必和Charles提到有不少香港歌手跟外國人合作,說到柏芝拍過韓片《白蘭》時,他們說:「張柏芝都有套韓國片《白蘭》,不過拍完《白蘭》變白行。」似乎暗寸柏芝拍《白》片票房失利,新城頒獎禮又食白果。
對於柏芝食白果,其所屬的環球唱片香港區總裁陳少寶昨開腔還擊,他在電話中說:「唔到冇獎,就咁簡單。我哋以平常心去睇,攞唔到獎冇所謂,公道自在人心,冇意見㗎。柏芝因為拍《福星報喜》度唔到期,出席唔到頒獎禮。」

王菲致謝
新城公關部昨則回應說:「我哋喺九月底已通知唱片公司同歌手關於頒獎禮嘅事,當時咁早又點會知邊個有冇獎?我哋邀請歌手出席,唔代表到嘅歌手一定有獎,好似傅天穎、Mango(王秀琳)、小雪同漢洋,佢哋冇獎都坐成晚啦。」
其實前晚幾位得獎歌手包括張學友、王菲、張惠妹和台灣組合F4均沒出席頒獎禮,其中王菲更錄了兩段致謝聲帶供大會播放。

飛車爆炸
另外,柏芝已答允本月六日為《慈善星輝仁濟夜》飛車演出,而柏芝所飛越的每架車都會安排爆炸,為此無綫與環球都分別為她加碼買保險。
另外,前晚無綫直播新城勁爆頒獎禮收視平均二十六點,即約有一百六十六萬觀眾收看,反而周六晚無綫《勁歌金曲第四季季選》只有十九點。
採訪:朱芷瑩、胡比、梁詠怡
攝影:陳志嵐、馬啟然、陳慧安