金融海嘯捲走全球股市29萬億美金資產，向來穩陣嘅美國名牌大學都蝕到攤攤腰，過去半年忙於發債撲水。好似出名最有米嘅哈佛，上月初就發行咗一大批高近6.5厘息、遠至2039年到期嘅債券，搵多15億美金（約117億港銀）傍身，事關佢嘅投資基金喺舊年6至10月間，總資產按年跌咗22%，得番288億美元。
至於普林斯頓算叻仔，同一時間只係跌咗11%，但校長ShirleyTilghman就喺校內通訊發定盈警，話今年6月底止，全年埋單或會急瀉25%，所以一於跟風抽水，前日就係該校自94年來，首次賣出10億美元債券，年息有5.7厘。

發海嘯財儲彈藥

事實上，美國名校財政狀況唔係想像中咁濕滯，只係既然有3條A信貸評級喺手，避險債券市場又咁有需求，梗係要趁機會發債，至少成本平過問銀行借，又可以儲定彈藥搵更多投資機會，一旦市況好轉至可以搵得更多。