當年今日

  余大狀幽默急轉彎 - 李八方

蘋果日報 2002/03/30 00:00


不過,最頂癮都係林超人話阿松有機會入主中南海,因為佢具備近代中國領導人嘅特質,好似國父孫中山娶宋慶齡、蔣介石娶宋美齡、毛澤東娶江青一樣,閒閒地都差二、三十年,形容梁伏戀係「老少咸宜」,重用毛主席名句贈阿松,「暮色蒼茫看勁松,亂雲飛渡仍從容;天生一個仙人洞,無限風光在險峰。」
阿松講《獅子山下》,林超人都有好多感觸,不過就係搞笑版,重話會趕在書展前出幾本書,書名都諗埋,其中一本會係《獅子山下的笑話》。
講番自己獅子山下的歲月,林超人住乙型徙置區,學校旁邊係H型徙置區地下,操場即係天井,朝早會突然「落雨」,因為樓上街坊啲刷牙洗面水會隨時兜頭淋。一聞到樓上師奶煮豉椒排骨,就知道好快會放學。
林超人嘅幽默大家可能聽慣,但原來Audrey(余若薇)都唔弱。當主持人將佢同陳婉嫻稱為「政壇Twins」,又問佢兩個拍檔選特首得唔得時?Audrey反應好快,即刻話兩個特首當然得,因為基本法冇寫到特首只限一個,正如基本法冇寫到有部長制一樣,政府最叻係話「基本法冇寫唔得即係得」。好嘢!咁又幽到政府一默。
(圖)余若薇好醒目,話兩個特首當然得,因基本法冇寫特首只限一個。


E-mail:[email protected]