爆機狂迷:熱爆!《GundamSeed連合VSZAFT》
街機搬返屋企開片

蘋果日報 2005/11/18 00:00


唓!又係高達?的確,高達題材遊戲近排出得頗頻密,不過當中以戰棋遊戲居多,由街機移植過來嘅《GundamSeed連合VSZAFT》就顯得動感、搶眼好多;據知此Game近期熱爆機舖,$4-$6一鋪居高不下,加上「挑機」不斷,初心者想練好技術,相信學費一定唔少,𠵱家出咗PS2版,大家又多個練習場所啦!試玩後感覺遊戲內容完全移植,而且更加入唔少PS2新元素,真係將街機搬返屋企打一樣。

記者:許福合
遊戲資料
主機:PS2
開發:BANDAI
類型:動作
人數:1-2人
售價:$495
今次新作可以話繼承之前大受歡迎嘅《DX》嘅玩法,除咗操控自由度高外,最正都係機種夠多,除《GundamSeed》內之機體全包羅外,更重要係加入最近人氣急升嘅脈衝高達,特色係可按需要改變形態同裝備,另外當然唔少得Freedom同Justice啦!
empty
■動畫中所有經典機體,都會在遊戲內出現。
empty
■若想了解劇情,亦有好多動畫可以欣賞。
攻略要點:主角覺醒提升戰力
遊戲內多名角色都各自有自己嘅覺醒能力,會出現唔同特種技能,如果選擇《SEED》主角基拉或阿斯蘭,就更會有特種爆發能力,即所謂進入狂戰士狀態,喺各方面能力都會得到大幅提升,覺醒使用次數有限制,要留意畫面覺醒計,儲滿就可以發動!
除此之外,畫面重有個Charge計,當儲滿就可以使用必殺技射擊,只有喺適當時候使用,就可以隨時反敗為勝,可惜未儲滿前係不能作出攻擊,使用時要注意,呢招除咗用嚟殺敵外,要打大形物體好似戰艦,亦特別有效。
empty
■基拉
empty
■利用各種技能,當然以「Win」做目標。
empty
■用超必攻擊戰艦,慳番唔少時間。
360度全方位戰鬥
提起《DX》,最經典都係佢個自由戰鬥玩法,今次《GundamSeed》就更進一步,玩家操控嘅機體可作全方位移動,完全感受到360度戰鬥嘅刺激玩法,同時,PS2版亦會配合良好轉換視點介面,戰鬥時可輕易轉回最佳戰鬥角度,怕打到頭暈嘅玩家就唔使擔心。
《GundamSeed》係一個高度注重操控技巧嘅遊戲,如當在空中嘅時候,只要連按2次跳掣,就可以高速移動同閃避,係經常使用嘅招數,但要注意Boost使用量,否則就會大硬直落地,後果當然俾人打到「豬頭」咁啦;所以建議要多配合連推兩下方向桿作高速閃避,實用性就比較大。另外,除懂得閃避外,當使用配備盾牌機種,喺避無可避嘅情況下,用盾牌硬擋就可大幅減低傷害,再尋求反擊。
empty
■激光劍係近身戰嘅主力武器。
empty
■除機體外,駕駛員都可自由選擇。
街機內容PS2玩法
作為由街機嘅移植版,遊戲內亦設有街機玩法模式,玩家可選擇唔同角色出戰,戰鬥目標同玩法與街機相同,都係將敵方打到死為止,玩到中途,亦會有部份版圖要玩家完成指定目標,最常見係將指定目標物打倒,當見到畫面出現一條敵方戰力計,就要小心行事,事關呢個時候敵人係打不完,會一直出現,直到目標條件完成。
當完成最後一版,唔好以為咁易就爆機,如果玩家作戰成績唔錯,就有機會進入隱藏版,裏面要打嘅敵人能力都勁幾倍,而且數量又多,最慘重係每當戰死,無得Continue,要重新玩過先可以再挑戰。街機有得挑機,PS2亦都可以隨時加入戰場,可以選擇1on1對戰,又或協力對付電腦,畫面將會以一分二方式戰鬥。另外,Menu內亦都有個真正嘅VS模式,可以1對1、1對2,甚至1對3,戰鬥方式都可預先調校,有部份機體重要喺VS模式先用到,必玩!
empty
■FreedomGundam
empty
■對戰模式可選擇1對1、1對2或1對3。
empty
■超多機體種類選擇,Fans過足癮。
empty
■對戰時畫面將會1開2顯示。