李八方online︱鄭敬基夥香港監察辦線上音樂會 歌聲撐被囚抗爭者
蘋果日報 2020/12/14 15:21
反送中鄭敬基香港監察抗爭者
鄭敬基希望用音樂聲援被打壓嘅異見人士、被囚禁嘅抗爭者，及被扣留內地的12港人。鄭敬基facebook圖片
藝人鄭敬基喺「港版國安法」生效之後舉家離港到加拿大，表明希望喺國際線上出啲力，佢聯同「香港監察」喺香港時間今個星期六（19日）晚上10點，舉辦線上音樂集會，希望用音樂聲援被打壓嘅異見人士、被囚禁嘅抗爭者，仲有被扣留內地嘅12港人，延續抗爭星火。
鄭敬基聯同「香港監察」於香港時間本周六（19日）晚上10時，舉辦線上音樂集會。鄭敬基facebook圖片
英美加國政要包括前港督彭定康、美國參議員魯比奧、加拿大保守黨黨魁奧圖爾都會喺集會透過視像發言，太極樂隊主音雷有曜、小島樂隊主音區新明同本身係風雲樂隊主音嘅鄭敬基都會演唱多首抗爭歌曲，多名流亡海外港人都會憑歌寄意，包括前本民前黃台仰、攬炒巴劉祖廸、前眾志羅冠聰，預告分享《十八》、《自遊》同《約定》。
集會亦會播放由德國學者馬寶康執導嘅紀錄片《香港本色》預告片、由《十年》及《樹大招風》金像導演歐文傑拍攝嘅抗爭短片、以及海外港人聲援香港的《榮光歸香港》最新音樂影片。
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！