蕭正楠同黃翠如呢pair真係好幸福，唔止可以一齊拍劇，仲可以孖公仔以情侶檔出席商場騷搵快錢，今日佢哋就去到尖沙嘴The One出席IQ博士35周年反斗狂歡派對，蕭正楠仲情深款款對住翠如BB唱冧歌，可惜完咗呢個活動後蕭正楠要繼續北上開工，所以今晚唔可以一齊度除夕喇。

搵得蕭正楠同翠如BB一齊出活動，梗係要佢哋玩下遊戲晒下恩愛咁，其中一part要兩人用絲帶手綁手，齊齊佈置蛋糕。玩之前一對「小情人」互相為對方繫上圍裙，蕭正楠已口衰衰咁話:「條圍裙咁短嘅，好彩你裡面有著衫啫!」

兩人齊齊用唔同零食佈置蛋糕，翠如BB仲插滿晒百力滋喺上面，蕭正楠一見又話喇:「你做咩呀!拜祭咩!」翠如即謂:「今日呢個日子，唔好講啲咁嘅嘢!」

之後蕭正楠唱兩首歌啦，第一首係鄭伊健嘅《Together》，佢話因為細妹鍾意伊健，今日又有到場，所以就送呢首歌俾佢。翠如聞言即扮嬲豬:「你都冇唱俾我聽嘅!」

好喇，跟住蕭正楠唱第二首啦，翠如就坐喺大會特別安排嗰一張孤獨的凳，左右前後都冇人，得翠如BB孤零零一個坐喺度，聽蕭正楠唱歌……由於呢張凳嘅擺位真係有啲突兀，所以畫面望落去，即使翠如BB同蕭正楠個表情幾咁情深款款，但效果都係好好笑咁樣樣。

蕭正楠唱到中段，翠如BB終於忍唔住，上台陪男友一齊唱。
可能真係有啲尷尬囉…