當年今日

千呎海鮮飯店25萬東莞有得諗

蘋果日報 2002/04/05 00:00


想喺香港開間飯店,隨時會被昂貴嘅租金及人工拖累,但如果喺東莞常平開間小型飯店,就唔會有呢啲問題,1,000呎地方月租只需?2,200,而且附近又有大型屋苑,兼且退休人士居多,單做港人熟客,已經唔憂冇生意啦!

記者:梁煒健 攝影:陳智良
條件優厚
租金特平 每月?2,200
現年49歲嘅何美蓮,由於喜歡唱粵曲,認識了一班曲友,而大部分嘅曲友又喺常平紅荔僑苑買咗樓,3年前上嚟探朋友之際,發覺此處環境優雅清靜,於是同年亦於上址買入一個900呎單位。後期何女士發覺嗰度以香港住客居多,加上屋苑附近舖租特平,終於喺去年9月30日開設「珍美海鮮飯店」,每月租金只需?2,200,呢個價錢喺香港分分鐘租間100呎房都唔得。
國內合夥人 酒店大廚
不過,限於國內條例,在國內創業必須與大陸人合夥至得。於是何女士就搵咗入廚12年、曾任常平粵華酒店大廚一職嘅葉師傅做合夥人。由於葉師傅煮嘅廣東菜有一手,加上旗下助手位位經驗豐富,自然令何女士放心。
周圍環境 海鮮飯店只此一家
由於飯店喺屋苑內,而屋苑已有80%售出,人流不少,且大部分為港人,其中絕大多數為退休人士;當中以政府公務員最多,如食環署、入境事務處、消防處、運輸署及警務處等都有,佢哋都會來幫襯。加上又冇競爭對手,附近只得一間東北餃子店及地道四川菜館,所以由港人主理嘅粵菜飯店甚為吃香。
節日旺場 農曆年港客最多
雖然店舖只可容納70人,但每晚卻可做三輪晚市,所以平日營業額一般都有?2,500至?3,000,遇到假日就更加旺場。例如農曆假期嗰十幾日,由年廿八至新十五,日日座無虛席,全為港人熟客,最少收入嗰日都有成?5,000,至於最高峯嘅日子,係年初七,當日嘅營業額高達?7,000。
初初做食肆,最希望盡快賺回裝修及頂手費,因為頂手連裝修費用共需18萬人民幣,若以兩年租約計算,24個月內每月盈利必須達?7,500以上。幸好飯店開業半年,一切順境,每月均有盈利,對於兩年後能回本,她絕對有信心。
二月份成本與盈利
租金 ?2,200
人工 ?12,000
雜費 ?12,000
入貨 ?42,000
二月份總支出 ?68,200
二月份營業額 ?84,000
二月份純利 ?15,800
近三個月每月平均營業額 ?100,000

珍美海鮮飯店開業資金
投資日期:2001年9月30日
租金(約一千呎) ?6,600(包括一個月按金連上期)
裝修 ?180,000
人工(廚房7名、侍應5名及雜工1名) ?12,000
宿舍 ?1,000
雜項(水電、柴油及石油氣) ?11,000
流動資金(主要為?45,000每日餸菜雜貨支出)
總投資額 ?255,600
主動出擊
1開放式設計 衞生有保證
雖然,間舖之前都係經營食肆,但何女士堅持所有舊爐具器皿一件不留,要全新裝修,即使佢係食肆嘅門外漢都冇有怕,因為佢有廚師拍檔同好友幫手,由碗碗碟碟到枱枱櫈櫈,都有人指點。講到裝修,珍美飯店還特別將個廚房作開放式設計,讓食客可以睇清楚呢處嘅衞生環境,加上特設密封式燒臘部,確保乾淨企理。希望能藉此一改大陸食肆唔衞生嘅印象,等食客食都食得安心啲。
2親力親為 免打斧頭
何女士的另一個頭痛問題係,國內人大部分都有個壞習慣,就係喜歡打斧頭,即使買些少嘢都可以講價兼開大發票,尤其買海鮮雜貨,雖然唔算係大數目,但長此落去,就會形成日後虧蝕嘅因由。因此,何女士每朝七點鐘就會包車去常平木棆綜合市場,自己挑選材料,由海鮮蔬菜到醬油薑蒜,何女士均落手落腳,一來食物會較新鮮,二來又唔怕俾人打斧頭。
3老火湯 冇味精
海鮮飯店自然以海鮮作招徠,其中招牌菜松子鯇魚、鹽焗蝦、鹽焗蟹,就最受歡迎;老火例湯亦係該店嘅出名產品,老闆娘強調冇味精兼用料十足,且用炭爐由朝煲到晚。所以有啲顧客日夜捧場,365日午餐晚餐都嚟幫襯。
至於未來大計,何美蓮希望喺常平最大嘅屋苑「新天美地」會所開設分店,要以粵菜為主,面積還要大現時的一倍,約2,000呎,希望此計劃能早日達成。
開業須知
由於東莞常平不及深圳繁榮,所以申請做飯店嘅手續亦較為簡化:
1.首先要去常平當地嘅工商局申請工商牌,即香港嘅商業登記。
2.除咗要畀當地工商局會員年費?120,每月均付?300嘅費用。
3.做食肆自然要申請衞生牌照,要去當地衞生局辦理,一般收費約?3,000。
4.由於申請程序繁複,可找當地熟人代辦。
5.店內所有員工均須接受身體檢查,例如要檢查有冇肝炎、肺病等。
6.常平開設食肆毋須防火設施許可證,店內有滅火筒就掂。
7.至於稅務登記,則向當地稅務局申請。
8.喺大陸交營業稅係每月都要交,而且賺蝕都要畀。
東莞招商網頁 http://www1.cei.gov.cn/govinfo/dfzfwy1.htm

經驗之談
在內地創業,租賃舖位同香港一樣,要預先知悉該物業嘅業權屬於邊一位,日後有所追究時都知係邊個負責。辦食肆一定要注意環境衞生,所以店內嘅去水位置、水渠及化油煙嘅沙井一定要做得好,否則,日久失修就隨時冇生意做。
聯絡我們
面對香港經濟不景,裁員不停,失業率持續上升,香港經濟步步轉型,人人北望。《北上創業》版訪問一些香港人在內地成功創業的例子,如閣下是其中一分子,又願意將你的經驗跟讀者分享,請聯絡我們。來信請寄將軍澳工業邨西駿盈街八號蘋果日報副刊《北上創業》版收或傳真:27420542。請附聯絡電話。