北韓試射導彈，亞太區股市腳軟。最醒嘅反為係南韓股市，低開2.01%，埋單只跌0.47%，即係由開市反彈1.54%。睇中韓股走勢方向，都冇法子可以喺韓指窩輪上面一顯身手，事關5隻C與P輪，夾埋成交金額只係15萬銀，而且唔啱價，亦要花好多功夫先摷到啲數據，買到貨最後都要輸錢。
恒指跌101點，急升一輪之後清涼一下都好。等跌多些少，低位買C輪。
中信C輪3525：中信泰富（267）收23元，跌0.35元，見回落至22.50元，買C輪3525。隻輪下月初夠鐘，輪價11.7仙，溢價0.2%，槓桿率19.7倍，已近平水，唔使理有效槓桿率與引伸波幅。要有心理準備，隻輪升跌幅度好大，正股變動3%，隻輪可以升跌40-50%。

華創C輪9092：華創（291）收15.10元，跌1元，恒指股中跌幅最大，吼位買C輪9092。隻輪明年5月尾到期，輪價41.5仙，溢價7%，槓桿率3.6倍（有效2.8倍），引伸波幅46.2%。
中銀C輪3641：人行（3988）A股掛牌，造得唔多好，拖低人行H股與中銀（2388）。中銀跌0.20元，收15.10元。趁低買C輪3641。
隻輪11月初夠鐘，輪價7.2仙，溢價4.1%，槓桿率21倍（有效10.7倍），引伸波幅22.2%，數據睇得上眼。
章盛