吳業坤、王喜、韓君婷、東華三院副主席王賢誌（Vinci）同伴侶周思聰（Kevin）、總理何猷啟同女友Angelika、玩具大王蔡志明囡囡蔡加怡同老公陳漢驄等，噚晚喺灣仔出席東華三院146周年慈善晚宴。

之前港鐵列車發生縱火案，造成多人受傷，事後坤哥喺facebook寫「火燭當然是要拍片放上網緊要過逃生啦！」不過好快就delete咗。坤哥噚晚就解畫話：「我係曲線啫!作為市民講件事，睇報道話有位洋人，因為拍片吸入過量濃煙需要急救。如果真係有事發生，大家應該根據逃生指示去離開，唔好阻住其他人救援。」

坤哥話寫完之後又覺得太曲線喇，驚有人誤會，所以就刪除咗。而佢喺自己個人facebook度有寫比較正常嘅感受，發表吓個人意見。係咪玩諷刺?佢話：「係，但諗諗吓覺得唔好，驚好易又中招，相信唔會太多人話我，希望傷者早日健復！」驚唔驚俾人話抽水?坤哥話：「我唔覺得係抽水，只係大家嘅價值觀係咪扭曲咗呢?其實分享趣事OK，但呢個危險情況，唔應該為收視呃like，但我嗰啲都係無傷大雅，唔會整到人，唔會幸災樂禍，大家對事情有唔同責任。」