利物浦今季拎到英超第4，下季可以出戰歐聯，領隊高路普近期都忙於擴軍，除咗想破紀錄簽入多蒙特前鋒奧巴美揚外，埃及翼鋒穆罕默德沙拿都係目標，不過沙拿就度假緊要啲，先返家鄉暢遊金字塔。

紅軍向意甲嘅羅馬，提出以3500萬鎊（約3.5億港元）收購25歲翼鋒穆罕默德沙拿，都傾得七七八八，只等沙拿到利物浦報到兼體測。不過呢位外號「埃及美斯」嘅國腳就正喺祖家，日前仲上載自已去金字塔遊覽車嘅相，似乎對加盟紅軍就唔太心急。據報沙拿最快就周二去到利物浦，一切順利嘅話，最快就成為紅軍一員。