越嚟越多有料之人搞私募基金，最新一位係國美電器（493）前主席陳曉（圖）。話說之前佢同國美大股東黃光裕鬥生鬥死，直至黃光裕為首嘅黃家重新掌權國美，佢無奈離開，人亦變得低調，去向一直成謎。

直至內地媒體喺一個慈善組織嘅網站發現，作為組織理事兼主要捐款人嘅陳曉，title唔同咗，家陣係一家叫上海聽潮投資諮詢有限公司嘅首席執行官，佢嘅去向就變得明朗化。
陳曉回應媒體查詢時亦都承認，創辦上海聽潮，主要業務係股權投資，佢仲話好多行業都存在投資機會，即使係產業高度集中嘅行業，都有可能面對模式被顛覆嘅命運，造就咗投資機會。
除咗去向大家有興趣，陳曉同國美單官司，亦都唔少人關注，但陳曉就繼續沉默。
又係嘅，進入咗法律程序，你叫佢點講啫又。