【名家搶先睇】災難是這樣錬成的（彭瑪莉）
蘋果日報 2017/04/17 17:07
聯合航空公關災難彭瑪莉
聯合航空近日拖乘客落機的關公危機，齊集所有災難元素，真係典型過典型的案例，要嚟做負面教材，無出其右。
出事位：因航空公司超賣，又無法利誘乘客自願讓出機位，竟出動武力拖乘客落機，仲要令對方血流披面！成單嘢，肇事公司毫無有利理據，人人都會搭飛機，感同身受，航空公司一開始就應知道自己衰晒，冇機會抝番生。
影像：衰成咁，講都未必有人信，但有片有真相，睇完，目定口呆，其他乘客尖叫，事主流晒血、拖晒地，如此對待已付錢乘客，彷彿回到蠻荒世界，嚇死人冇命賠。
社媒： 咁爆嘅片，點會唔爆紅網絡，在社交媒體瘋狂 viral 發酵？呢啲係今天 PR Nightmare 嘅不變軌跡。
種族歧視：華裔好、亞裔好，總之事件涉及少數族裔，被炒作機會又加一等。
思維停留在上世紀嘅管理層：呢個先係災難中的災難，公司管理不善（Hee hee，今次唔係講因航你）、企業文化僵硬、員工只不識人性只知按本子辦事 •••••凡此種種，絕非一朝一夕，投訴肯定堆積如山，但CEO 有想過改嗎，還是他正是罪魁禍首？像今次，一邊 hea 住道歉，一邊內部又讚員工做得對，咁點先，邊句先係真心話呀大班？都話咗世界如今咁透明，資訊飛快流通，根本無空間見人講人話見鬼講鬼話，呢啲公關 ABC 都唔識，學乜鬼人做總裁！股價大跌，乃咎由自取。
愛抽水的行家：哈哈哈，災難當中，如果你處理不力，全民齊聲聲討，咁抽水行為必然陸續有來。西北航空靚抽呀，在航班上說 We beat our competitors .... not our customers .... 聽見都笑咗，仲有維真航空哩，Richard Branson 都忍唔住不點名教人甚麼才叫待客之道。
有花生友接力，災難梗冇咁易雨過天清。