「十優港姐」麥明詩，性格剛強、敢言，唔知係咪咁，今日就有報道話佢喺大台拍劇時得罪咗一個阿姐級人馬，報道就冇講麥明詩得罪咗邊位阿姐，但出道兩年嘅佢，拍嘅劇唔係太多，暫時只有四套《賭城群英會》、《使徒行者2》、《誇世代》，同埋緊尾嘅《是咁的，法官閣下！》。

報道話，麥明詩雖然喺四套劇入面，同女主角嘅戲份都唔多，但報道入面嘅知情人士就話，要喺電視台得罪人，並唔需要有同場拍戲嘅交流，知情人士話最近有大台嘅高層就收到一位阿姐投訴麥明詩，話佢係化妝間見到麥明詩，話佢只顧做自己嘢，唔同佢打招呼，話佢份人冇禮貌喎！

除咗有位阿姐投訴佢冇禮貌之外，報道仲話，之前有幾位阿姐不約而同咁向監製投訴，話佢態度寸爆，對人唔熱情，拍完劇就唔同其他演員交流，冇乜人緣。咁報道入面，都有問番麥明詩嘅回應嘅，佢就有咁嘅解釋，話自己唔係止係慢熱啲，又唔鍾意「乜姐」、「物姐」咁稱呼人，又會驚麻煩到人，未埋位前，又驚人睇緊劇本，亦想尊重別人嘅私人時間，驚人覺得佢拉攏。但問到佢知唔知得罪咗邊個阿姐，麥明詩就話唔知，又話自己都控制唔到，最緊要做好本份。

更多娛聞，喺晒《娛果》
http://fb.com/appledailyent