唔夠一個禮拜之前，寶哥哥（圖左）先話領匯一定可以如期噚日掛牌，重同人打賭，卒之跌晒眼鏡。寶哥哥好有信用，話輸咗就請傳媒食蛋撻，於是噚日喺東亞記者會即將完結時，佢就話：「我想同你哋講，我喺樓下準備咗蛋撻畀你哋，因為我輸咗蛋撻畀你哋，我以為政府會打『茅』波，今日可以上市。」跌眼鏡雖然就失威啲，但佢話：「我成日都跌眼鏡，我都知道自己唔夠醒目……好彩重有一對。」
講開寶哥哥，佢真係大義滅親，鬧特區政府，連個細佬李國章都片埋，但私下兩兄弟就感情好好。上星期六晚，八方喺旺角砵蘭街赫然見到國寶國章兩兄弟着到西裝骨骨咁，原來係同太座一齊行朗豪坊，發展商鷹君集團嘅副主席羅嘉瑞重親自出馬帶路，唔少市民都對佢哋眼望望。八方噚日問局長個新聞秘書，局長嗰晚點解咁有閒情行街，佢話局長聽過朗豪坊個名，想去睇睇啫。



傳真︰2623-9278
電郵︰[email protected]