蔣志偉揸貨車出身,職業習慣堅持跑到尾,其他人卻未必咁有體育精神鬥到最後一秒。八方問過蕭思江同李永健,兩人講到明今日拉票點到即止,夜晚約7點就收工去食飯,抖到10點半先去灣仔會展新聞中心等結果。
另一位候選人柳玉成話自己住九龍,唔使一早起身去投票,所以朝早9點至會搵埋三架車開始喺香港公園票站拉票,佢話搵到五個義工幫手。
凌尉雲話自己競選經費有限,所以冇宣傳車巡區,只會同一班義工到幾個大票站派傳單。佢好老實咁講,唔旨望贏,目標係攞到百分之五選票,拎得返五萬蚊選舉按金就心足。另一位女將何來話冇人冇物,戰線不能太長,只可以打陣地戰,之前去過西區、南區同灣仔拉票,今日集中喺東區嗌咪。